Redactura / Redactur Cuntrasts
60-80%, Cuira
RTR è in'unitad d'interpresa da la SRG SSR e la chasa da medias per la Svizra rumantscha. Di per di procuran sur 160 collavuraturas e collavuraturs en 30 differentas professiuns per infurmaziuns actualas, novitads regiunalas, sport e divertiment.
Nus tschertgain ina persuna per cumplettar la squadra da l'emissiun Cuntrasts.
Tge èn las incumbensas?
- realisar films documetars e contribuziuns per ils differents vecturs dad RTR
- collavurar en projects multimedials / cun auters teams
Tge spetgain nus?
- ina buna savida generala
- experientschas fundadas en il champ schurnalistic e da far televisiun
- interess per in lartg spectrum da tematicas: economia, politica, societad, sport & cultura
- savair lavurar autonomamain ed organisar projects a lunga vista
- vulair u gia savair filmar sez (VJ)
- bunas qualitads communicativas e linguisticas
Tge offrin nus?
- ina lavur fitg multifara en in team creativ
- in bun clima da lavur en in'interpresa moderna ed innovativa
- pussaivladads da scolaziun e furmaziun
- cumenzament: entschatta fanadur 2025 u tenor cunvegna
Aventuras opticas sco quellas dad accumpagnar dunnas ucranaisas en il Grischun u artists grischuns en il Giapun na mussan betg be la vastezza dal mund rumantsch, ma er quella da la lavur per ils Cuntrasts en summa.
Nossa purschida
Schurnalissem da qualitad è nossa fatschenta principala e nossa passiun. Nus essan redacziunalmain libers, promovain la creativitad e purschain bler spazi per concepir chaussas novas e d'auta qualitad.
Il schurnalissem da qualitad è tar nus era digital. Perquai sondain nus novas pussaivladads ed experimentain cun novas furmas e novs formats: digital, interactiv e crossmedial. Nus concepin al puls dal temp ed al gnerv dal public.
Nus inscuntrain in l'auter a moda colleghiala, lavurain autonom e gidain individualmain a furmar noss clima da lavur. Noss success sa basa era sin las fermezzas persunalas e sin las qualitads professiunalas da tuttas collavuraturas e tuts collavuraturs.
Nus cuntanschain e muventain cun noss programs l'entira Svizra. Nus agin cun respect ed a moda independenta; uschia promovain nus la furmaziun da l'opiniun e rinforzain la diversitad. Nus essan loschs da nossa lavur e da nossa contribuziun a la Svizra.
Noss mintgadi
Lieu da lavur
Contact
davart la plazza
Anna Serarda Campell
Manadra reflexiun
+41 58 136 30 64
davart il process d'annunzia
Flurina Foppa
Manadra resursas umanas
+41 58 136 31 08
Lieu da lavur
- RTR Radiotelevisiun Svizra Rumantscha
- Masanserstrasse 2
- 7000 Chur
